Cin News

देशकै राजधानी काठमाडौँ । जहाँ सातै प्रदेश र ७७ वटै जिल्लाका मानिसहरू बस्छन् । काठमाडौंँ भाषा, संस्कृति र विभिन्न जातजातिको फूलबारी हो । आफू जन्मिएको भूगोल छोडेर सहरको सकसमा बाँचिरहेकाहरू थकान र पीडामा गाउँलाई सम्झन्छन् । मनभरि गाउँ सम्झिएर सहरको ब्यस्ततामा अल्झिरहेकाहरूलाई खेतबारीमा डुल्ने र गाउँकै खान्कीमा रमाउने वातावरण धेरैको खोजीमा पर्छ । सुमन दाहालको ‘मौलिक भान्सा घर’ यस्तै भोक र रहर मेटाउन तल्लिन छ । चक्रपथ ( सुकेधारा) बाट ३ किलोमिटर उत्तर लागेपछि कपन गुम्बाको फेदीमा पुगिन्छ । जहाँ ७ रोपनी भीरालो जग्गा छ । सुमनको सपना र मिहेनतले सिँचिएर मलिलो बनेको । जहाँ दूधालु गाई पालिएको छ, काँक्रो, फर्सी, लौका, करेलादेखि कर्कलोसम्म लहराइरहेका छन् । त्यहीँ पालिएको छ कुखुरादेखि टर्कीसम्म । आँप, नासपाती, लिची र अङ्गुर लटरम्म फलेको देख्न पाइन्छ ।